March ni 20, Zirtawpni khan Mizo Hnam Runah chhung inkhawm neih a ni a. He hunah hian Er R Rohmingliana MLA, General Secrerary leh MNF Legislature Party Secretary chuan thu a sawi.

Er R Rohmingliana chuan, session report tlangpui a pe a. "Mizoram Universal Health Care Scheme (MUHCS) hi MNF sorkar hunlaia duan kha a ni a, September ni 26, 2023 khan notification tihchhuah a lo ni tawh a. Mizoram Universal Health Coverage Scheme (MUHCS) tia vuahin, April ni 1, 2024 aṭanga hman ṭan tura tih a ni. Hetah hian cashless a nih tur thu te, nuai 5 thleng chhungkaw khatin bill theih a nih tur thu te, sorkar hnathawkten an thawh ve turte thlenga tarlan a ni. Thailand-a Health Minister hova an han zir pawh khan thil thar an han hmuchhuak vak lo a nih hmel a, MNF duan ang diak diak deuh thawin an hmang a ni," a ti.

MNF General Secretary chuan, "Lengpui ram hralh chungchanga CBI concent an pekna lehkha hi a complain-tu hnenah a copy pek ve a ni lo a. Chu bakah a complain-tu Pu Lalpianfela Chawngthu-in a complain-na no 12-naah Chief Minister leh Revenue Minister inrawlhna a tarlan chu CBI consent lehkhaah hian tarlan a ni lo bawk. CBI consent an pekna hi hei aia chiangkuang zawk ni thei se a ṭha hle," a ti bawk.

MNF Legislature Party Secretary chuan, "Tun budget pharh tak kha budget ṭha lo tak a ni," a ti a. "Budget pumpui aṭanga a let leh tur awm lo chi, sorkar inrelbawlna (Revenue Expenditure) chu 82.52% a ni a. Tin, hmasawnna hnathawhna tur (Capital Expenditure) chu 17.45% chauh dah a ni a. He 17.45%-ah hian kan loan rulhna tur a la tel zui a ni. ZPM-in an sorkar hmaa an policy lehkhabu tihchhuahah kum 2022 leh 2023 MNF sorkar laia Revenue Expenditure 71.43% leh Capital Expenditure 28.57 chu ṭha lo an tih thu an tarlang a. Chuti a nih chuan tun budget hi ZPM party chuan ṭha lo an ti hle ang. Tin, inremchem tura insawi, CM leh Minister ten motor pakhat bak kawl lo tura insawi hian an bawhchhe vek a ni," a ti a. "Tun sorkarah a kum telin vaibelchhe telin kan leiba a pung awk awk mai bawk a ni," a ti bawk.

Pu Rohminga chuan, "Tun ṭum Session-ah khan bill 10 kan ngaihtuah ho a. Bill reng reng cabinet-in an lo ngaihtuah tawh hnu sorkar putluh a ni ṭhin a. Tun sorkarah hian bill lut te pass loh duh, ruling lamah an awm ṭhin a, hei hian cabinet-in tih tak zetin ngaihtuahna an hmang lo tih a tilang chiang hle a ni," a ti bawk.

Chhung Inkhawm hi Pu Rochhunga Ralte Ex MLA, Adviser-in hunserh a hmang a, Upa V Zoliana, Adviser-in hunserh a hmang bawk.

(LALLENMAWIA JONGTE)

Secretary

Media & Publicity Department: Mizo National Front

Memo No. 447/2026/Dt. 21.03.2026