AMC Election campaign-a feh chhuak mek MNF Senior Vice President Dr R. Lalthangliana MLA chuan Dt.09.04.2026 (Ningani) hian MNF AMC ward no-10, Zotlang leh ward no-7, Thuampuite tlawhin campaign office hawnnate neiin thu a sawi a.

Dr. Thangtea hian ZPM sorkarin a let thawka ration buhfai man a tihsan hi AMC area-ah pawh tuartu chhungkua an tam thu te, tui bill, electric bill leh chhiah chi hrang hrang a let thawk te, hmun thenkhatah a let thum/let li laia an tihsan chu mipuiin kan tawrh hle thu a sawi a. Chief Minister leh Minister/MLA-ten an tawngkam thiam leh an sawi mam thiam vang ringawtin mipui chhiah pek a tlem phah lo tiin, a tuartu leh hre chiangtu chu mipui an nih thu a sawi. "Tawngkam thiam vang leh sawi mam thiam avangin thil man a hniam phah lova, bill leh chhiah kan chawi leh pek a tlem phah lova, sum leng vak a tam phah hek lo," a ti.

Dr.R.Lalthangliana chuan Mizoramah chuan AMC area-a chengte hi politics ngaihven lo pawha khawsa theite awm tamna hmun a ni a, buhfai, ei leh bar, tui, electric, Gas leh kawng leh a that a, ei bar kan hnianghnar chuan sorkar thaah kan ngai mai a, mipui kan lungawi mai thin tih sawiin, hengah te hian ZPM sorkar a hlawhchham fai vek a ti. Chuvangin, Aizawl khawpui enkawl turin ZPM an tlak loh thu sawiin, Aizawl khawpui hmangaih bertu MNF candidate-te thlangtling turin mipui khawngaih vote a dil.

ZPM sorkar atang chiaha sum leng vak a tlem thu sawiin, mimal leh chhungkaw sum lakluh a tlem a, chu chuan dawrte leh dawr lian, bazar leh sumdawng zawng zawngte a nghawng a, ram pumah pawisa a lo vang ta em em a, hei hian kan hrawn mek sorkar that lohzia a pholan thu a sawi bawk.

Ram khat hotupa CM berin thudiklo a sawi fo chuan, Mizote hi hnam dangin dawtsawi hmang hnamah min chhuah mai ang tih Dr.Thangtea chuan a hlauhthawn thu a sawi a, kan Chief Minister hian Assembly House chhung leh pawnah pawh thudik chauh sawi thin tawh se ka duh khawp mai, neutral leh mi chinchang hriaten tunah pawh hian an hmu nep tawh khawp mai a ti bawk.

Chief Minister-in a bial Thenzawlah Aizawl State Capital sawn rawtna Central sorkarah ziakin a thehlut a, a sum dil pawh a hmu a. ZPM MLA chhuanvawr pakhat pawhin Aizawlah eng thil thar mah awm tawh lo se a duh thu Assembly House-ah a sawi bawk a, Aizawl mipui hian engtin ngai ang maw ? Dr.Thangtea chuan a ti bawk.

Thuampuiah hian ZPM member 18 MNF Senior Vice President hian MNFah a lawmlut nghal.

(R.LALHMANGAIHA)

Secretary

Media & Publicity Deptt : Mizo National Front

Memo No.465/2026/ Dt.09.04.2026