March ni 27, 2026 khan Mizo Hnam Runah Pu Lalpianfela Chawngthu, MNF Gen. Hqrs. Legal Board Vice Chairman chuan thusawiin, The Aizawl Post, March 17, 2026 chhuak a, “India danpuiah Article 371(G) awm lo mahse; Bengal Eastern Frontier Regulation-ah Mizote tan himna a awm tawk tih Chief Minister, Lalduhoma chuan a sawi thu sawiin, Assembly Session-ah pawh ram neitu kan nihna chu Bengal Eastern Frontier Regulation (BEFR) 1871-ah Mizorama mi cheng sa – schedule tribe ni loin ram an neih hi khap a ni. India-a zalen hnuah India Independence Act, 1947 hmangin adopt chhoh a ni a, state kan nih thlengin a la valid reng tih a sawi bawk thu a tarlang.

'Chumi hmang chuan kan inremna thuthlungah Article 371(G) hi awm miah lo mah se, a lo awm daih tawh a, 371(G) hi thil awm sa ziah nawnna a ni a, thil thar pakhatmah a awm lo. BEFR-ah hian 371(G) ami hi a awm sa vek tawh, Tribal-in non tribal hnenah ram a hralh thiang loa, neitu nihna a hlanchhawng thei lo a, state sorkar remtihna chauhin a theih' tih Chief Minister hian sawiin, chumi hmang chuan sorkar laipui hnuaia awm reng reng, state sorkarin a mamawh ve ang chi chu he dan hnuaiah hian sorkarin a remtih ang chin chu a pe tih a sawi a ni tiin, Pu Lalduhoma thusawi hi ngun taka ngaihtuahin kan ram leh hnam tan ahim lo a. Chuvangin, abul thum deuh atangin BEFR, 1873 leh Article 371(G) chungchang hi sawi a lo ngai ta a ni, Pu Mapiana chuan a ti.

Pu Mapiana chuan, 'Inner Line Permit hi a tirah chuan British mite, a bikin sumdawng ho hamthatna atana siam leh duan a ni a. Kum 1872 vel atanga lo intanin, Assam leh Cachar rama sumdawng hote hamthatna tura ruahman a ni. Khatih hunlai khan Cachar leh Assam te chu Bengal hnuaiah an la awm vek a. Mizoram pawh hi British hnuaiah kan la awm lo a ni. January Ni 17, 1872 khan Governor General in Council of British India chuan, Resolution hmangin British India sorkar hnuaia officer ten Thelret thar chhuahna district-ah an thuneihna huamchhung (jurisdiction) tur chin rinfel sak atum a. Hei hian a tum chu ramri (line) piah lamah chuan mihring nunna venhim kawngah mawh a phur loh tur thu hriattir a tumna a ni ber a; British mite hi he ramri (line) piah lama an kal phalna chin tur bithliahna a ni ber a ti.

Mizoram, Nagaland leh Arunachal Pradesh te chauh hian Inner Line System kan nei mek a ni. Lushai Hills District hi Government of India Act, 1935 chuan ‘Excluded Area’ ah a puang a. British India Regulated District a ni ngai lo a ni. Inner Line Regulation hi Assam State hnuai a Mizo District a lo pian te, Union Territory leh State puitling kan lo nih chhoh te khan hman a ni chho ta zel a. MNF leh India sorkarin June ni 30, 1986 a Inremna an ziah pawh khan ziah lan niin hman zui zel remtih a ni a. MNF leh India sorkar inremna thuthlungah hian “ILP tihtawp a nih dawn emaw tihdanglam a nih dawn chuan Central sorkarin State sorkar a rawn hmasa lovin a tidanglam emaw a titawp lo ang” tiin dah a ni a ti.

Pu Mapiana chuan helai bung leh changin a sawi awmzia hi chu, mi tu pawh, a ram mi ni ve lo chuan state sorkar emaw state sorkarin a ruat officer-te phalna lo chuan “Inner Line” piah lama ram leh ram atanga thil lo chhuak/tharchhuahah te hamthatna/hlawkna dan angin an nei thei lo tihna a ni ber. Transfer and ownership of land kan tih lai tak hi chiang kek kawka sawina a awm hran lo a ni a ti.

Article 371G leh BEFR, 1873 te hi han khaikhin dawn ta ila, Article 371G hi chu India leh Mizote kan inremna vanga India danpui bung khat a ni a, thil pawimawhah chuan State Assembly in thuneihna tawp a nei a ni. BEFR ve thung hi chu British hunlaia dan-regulation siam ve chauh kha a ni a. British hoin thing zai leh thingpui hmanga sumdawnna kawnga an hlawkna tura an siam, a hnua a lehlinga tribal-te venhimna atana hman ve chauh a nih thu a sawi bawk.

Article 371G chuan Mizote hi kan ram (land), sakhua leh social practices customary law-ah te thuneihna pumhlum min pe a. Central sorkar hian eng dan pawh siam se, kan ram (land) leh sakhua, kan vangtlang nun khawihah te chuan lo hnawl theihna kan nei a, State Assembly-in kan lo pawm e phawt a ngai a ni. BEFR hi chuan chutiang tak thuneihna min pe zo lo a, Mizote tan kan himna tluan tling a keng tello hrim hrim a. Ram chungchangah pawh a sawi ber chu sorkar thu loin pawn lam miin ram chungchangah hamthatna/hlawkna a nei thei lo a tihna mai chauh a ni Mapiana chuan a ti.

MNF Lengal Board Vice Chairman hian Article 371G chuan Danpui hnuaiah keimahni a dan (rules) siam thei tura sawi thuneihna min pek laiin; BEFR hi chuan hmanlai dan, ILP hmanga hnam dangte kan ram luh phalna leh ram an nei ve tur venna a ni tiin, Article 371G nen chuan kan thuneihna a insan hleihzia chungchang a sawi bawk.

Article 371G kan hnam tana hlutna leh pawimawhna hre chiang bera insawi, MNF General Secretary pawh lo ni ve tawh Pu Lalduhoma’n kan hnam pasalthate sa lu hawn article 371G, party inbeihna atana a hmanga, sawinep tuma thu dik lo hmanga BEFR te nena huang khata a dah duh mai hi mi pangngai tan chuan thil tih awmloh tak a ni. Lalna leh thuneihna chauh um, kan ram leh hnam himna pawh dah pawimawh zo lo a nih zia a tilang chauh a ni. Tun hnuah chuan hetiang thu hi sawi tawh lo se a duhawm khawp mai. Kan ram leh hnam himna hi a hmasa berah dah ve tawh se tiin Pu Lalduhoma a demna thu leh ngenna thu a sawi.

Mapiana chuan, Opposition nih laia FCAA 2023 te pawh dan sakei ti zuah zuah, CM nih hnua a hlauhawm lohzia leh Dan Beramno ang hiala mipui min zirtir leh chiam duh a ni hi a vanduaithlak a. Kan ram leh hnam hralh chhunzawm zel lo turin kan chah nghal bawk a ni. Article 371G hi MNF leh Mizoten kan duhthusam a ni bik lo, India pawh a tawlh nasa tho kan inremnaah hian. Mahse, vawiin thlenga Mizote Mizo kan la nihna chhan chu article 371G hi a ni. Hei hi zalenna famkim- Republic of Mizoram kan nihna tura kan chawlhlawkna a ni. Pathianin rem a tih hunah zalenna famkim neiin keimahni ngeiin ro kan la inrel dawn a ni a ti bawk.

(B.LALHMANGAIHZUALA)

Secretary

Media & Publicity Deptt : Mizo National Front

Memo No.457/2026/ Dt.28.03.2026