INKALPAWHNA KAWNGPUI THA LEH THLAITHAR TIHRAL LEH LEILUNG HAUSAKNA HAICHHUAHNA TURIN KAWNG KAN NEIH TAM ANGAI- Dr Thangtea

Vau thla vawiin ni 27, 2026 hian MNF Sr. Vice President, Dampa bialtu MLA Dr. R. Lalthangliana chuan a bialchhung, East block huamchhung khaw hrang hrang, Ailawng, Reiek, Chungtlang, Rulpuihlim, W. Lungdar, Khawrihnim, Hreichuk, Kanghmun leh Lungphun khuate tlawhin hun a hmang a.

He hunah hian Dr. Thangtea chuan, "Kan ram leilung hausakna haichhuak tur leh kuthnathawkten awlsam leh zangkhai zawka hma an lak theihnan, inkalpawhna kawng, a bikin agriculture link road a tam thei ang ber siam hi ka thupui berte zinga mi a ni," a ti.

Hemi chungchang hi sorkar thuneitute hnenah rawtna ka thlen tawh nghe nghe a. Ramtha, thlai chi hrang hrangten an ngeih tur haichhuah hi kan mamawh em em a. Hemi kawngah hian bial mipuite pawhin tha leh ngaihtuahna hmang nasa lehzual turin ka sawm a. Hei hi kan intodelhna tur kawng pawimawh em em mai a ni. Awlsam lutuka sum hmuh tum hi kan bansan tan tawh a, Pathianin min beisei dan pawh a ni.

Reiek leh Ailawng khuate hi kan ram hmelhmang lanna, khualzinten an tlawh tamberte zinga mi anih avangin PWD hotute hnenah pawh kawngsiam hna uluk sak turin ka chah a ni, a ti.

Dr. Thangtea chuan, hun engemaw chen MLA, Minister a lo nih hnua, Dampa bial mipuite duhsakna avanga MLA atana lakluh tam ber niturin, tum sarihna atan lakluh a ni leh ta chu lawmawm ka ti a. Assembly House ah tunhnaia dawt thu leh thubelhchian dawllo huaisen deuh deuha sawi a ni ta hi a pawi ka ti takzet. Sorkar hmasate sawichhiat leh dawta puhmawh vak vak maite hi thil thleng ngailo a ni. Hmalakna tha leh dik chu chhunzawm zel thin a ni a. House zahawmna hi vawn a tul a, thudik chauh sawina hmuntur niin ka hria. Tunhmain hetiang hi a thleng ngai vaklo, a ti.

Dr. Thangtea, health minister lo ni tawh chuan, kan hunlaiin health care scheme thar kan duangfel hman veka, sorkarna a tawp tak avangin sorkar thar ZPM in hetiang deuh chiah hian MUHCS a rawn duangchhuak ta a. MNF duansa leh ruahmansa engemawzat an rochun avangin ZPM sorkar hi an vannei hle a ni, a ti bawk.

MNF Sr. Vice President chuan, kan hma lawk AMC inthlan lo awm turah, Aizawl mipuiten thubelhchian dawllo sawiching leh enchhin dawllo ZPM te an hnawl dawn nia sawiin, bialchhung miten an theihna zawnah, Aizawl-a an chhungte theuha MNF tan hma lo la turin a chah nghal bawk a ni.

Aizawl road South PWD hotute hnen atangin, Aizawl - Reiek leh Reiek - W. Lungdar peng thleng kawngpui zauh leh siamthat thuai anih theihna tura hmalakna kalmek report ngaihthlak a ni a. Rawpuichhip to Buarpui kawngsiam hna thawk mek hotute hnen atangin an hmalakna hrang hrang report ngaihthlak a ni bawk. He hunah hian bialchhunga MLA hmalakna hrang hrang lawmawm an tih thu bial mite hnen atangin ngaihthlak a ni bawk.

Dr. R. Lalthangliana hi PWD hotute leh Rawpuichhip - S. Sabual- Buarpui kawngpui siamhna thawk mektu INKCA, Delhi, hotute leh party hruaitu thenkhatten an tawiawm a ni.

(PETER CHHANGTE)

Secretary

Media & Publicity Department: Mizo National Front

Memo No. 454/2026/ Dt. 27.03.2026