"Kan State Budget aia tam leiba nei dinhmuna min dahtu State Sorkar lai hi AMC enkawl turin an rin ngam ka ring lo" - Pu Lalruatkima, MNF Treasurer

Vawiin Ni.26.3.2026 (Ningani) chawhnu dar 1:30 khan AMC Ward-I, Durtlang ah Durtlang MNF-AMC Campaign Committee buatsaihin Aizawl Municipal Corporation Election 2026 MNF Campaign Kick-Off neih a ni a. MNF Treasurer Pu Lalruatkima chuan khuallian niin a hmanpui.

Pu Lalruatkima, MNF Treasurer chuan thusawiin, AMC Election 2026 lo awm turah Pathianin candidate ṭha tak tak, thiamna lamah te, Kohhran leh khawtlang rawngbawlna thleng pawha mi chhuanawm tak tak min pe a. Pathian leh Aizawl mipuite zarah Aizawl khawpui enkawl zui turin Sorkarna kan siam ngei kan beisei tlat a ni, a ti a. Election hmachhawn tur hian sum leh pai leh thil dangah innghat lovin MNF innghahna Bible chang neih sa Sam 20:7 hi hre thar chungin Lalpa kan Pathian hming lam hmasa zel tur kan ni a; chu chu MNF innghahna awm sa reng leh kan chakna hnâr ber pawh a ni, a ti.

Pu Lalruatkima chuan State Sorkarah leh AMC ah MNF kaihhruai Sorkar awm tawh te'n Mizoram leh Aizawl khawpui hmasawnna an thlen tawh dan hrang hrangte sawiin, Pathian, Ram leh Hnam dah pawimawh hmasa zel chunga ram enkawl ṭhin MNF kutah AMC enkawlna pawh dah zui zel a him ber dawn a ni, a ti a. "Kan State Budget aia tam leiba nei dinhmuna min dah mektu leh chhiah tam tak tipung a, ram mipui min dahkham mektu State Sorkar lai mekte hi AMC enkawl turin an rin ngam ka ring lo," a ti bawk.

Campaign Kick-Off hmanpuitu Pu Lalruatkima chuan AMC Election 2026 lo awm turah Mizoram chhung leh pawna cheng Zofa zawng zawngte Jerusalem Aizawl khawpui hmasawn zelna tur te, ram chhunga chengte leh ram pawn aṭanga rawn tlawhtute tan pawh khawpui nuam leh mawi zawk, khawpui him zawk leh kawng hrang hranga Aizawl khawpui cheina tura hmalakna tur ruahmanna 'MNF-AMC Election Manifesto' te ngun taka min lo zir chian sak chunga Ward-I MNF Candidate leh Ward tina MNF Candidate zawng zawngte khawngaih taka lo vote tling ṭheuh turin Aizawl mipuite a sawm nghal a ni.

AMC Ward-I MNF Candidate Pu C.L Biakhlua pawhin thusawiin, "MNF Candidate atana ruat ka nih tirh aṭanga Ward mipuite thlawpna nasa tak ka dawn avangin lawmthu ka sawi a; a tawp thlenga min thlawp zui zel tur pawhin ka ngen che u a ni," a ti a. Aizawl khawpui leh Ward-I hmasawn zelna tura ka thiamna leh theihna te ka hman chhuah ngei theih nan khawngaih taka min vote ṭheuh turin ka ngen che u a ni, tiin Ward-I mipuite a sawm nghal bawk a ni.

Campaign Kick-Off hi Pu R.C. Lalrinliana In, Durtlangah neih a ni a. Pu H. Zarzokima, Durtlang MNF-AMC Campaign Committee Chairman-in kaihruaiin, Upa J. Lalsawta, Durtlang Mual Vengin hunserh a hmang a. MNF-AMC leh Ward-I MNF-AMC Campaign Committee Secretary te hnen aṭangin report ngaihthlak a ni bawk.

(LALLENMAWIA JONGTE)

Secretary

Media & Publicity Department: Mizo National Front

Memo No. 453/2026/ Dt.26.03.2026