Press Release

Martarten ram tana nunna an hlan phal nachhan kha nungdama awmten an hmabak hlen turin kan beizel dawn tih an hriat vang a ni

-Rochungnunga, President, Ex-MNA

Tomir thla, vawiin ni 15, 2026 (Zirtawpni) chawhma dar 11:00 hian Mizo Hnam run chhung inkhawm neih a ni a. He hunah hian Pu Rochungnunga, President, Ex-Mizo National Army, MNF Gen. Hqrs. chuan thusawiin, "Mizo hnam tana martarte khan huai taka an nun an hlan phalna chhan pakhat chu, nungdama la awm ten an thihchhan leh an hmabak hlen turin an bei zel dawn tih an hriat vang a ni. MNF hian Mizo hnam tan zalenna kan la sual reng a. Kan zawh tawk leh kan mamawh tawkin Pathianin min kalpui zel a ni. Zalenna kan sual kha Pathian ruat a ni a, MNF pian hma daiha, Pathian thu in a sawi tawh, Bible-ah kan hmu a ni. Kan farnu leh fanuten saree an kaih ve mai lohnan te, vai sumdawng lianten min chimral loh nante, hnamdang mi hausate hnuaia kuna kan inhlawhfak mailoh nante MNF in zalenna kan sual kha a tul tel bawk a ni," a ti.

Loneituin buhpui a seng hmain thlai thar hmasa a ei thin a. Hetiang chiah hian, zalenna famkim (buhpui) kan neih hmain thlaithar hmasa, state dangte neih ve vek lemloh, 371(G) kan neihte hi kan tlan mek rih a ni.

Pathianin he hnam a dinchhuah nan rauhmanna a neisa vek a. A khaipa niturin mi pawimawh a ruat thin. Kan mamawh ang zelin, Mizo Union hun a liam a, Congress leh PC hun a lo thleng leh a. Hun harsaah MNF hun min pe leh a, hnam rilru pu mite chu hmundangah pawh kal se, party dang an tuipui theilova, MNF ah bawk an lokir leh mai thin. Tuna kan sorkar hrawn mek pawh hi, Pathianin Ismaela pian a ruat ang kha a ni a. An rorel dan leh an hmalaknaah lungawi a har hle. Hnam sipaia lo tang tawh nihna neih chak em em te an awm a, an batallion pawhin a an hriatpui hauh lohva hruaitu anga lo inchhal te pawh an awm mek a ni, a ti.

Ex-MNA President, Pu Rotea chuan, Ex-MNA te tana sorkarin Maumual ram min pek chu kum 1988-ah tihfel vek tawh a ni a. A leichhawngtu leh ruahmanna dang neitute pawhin a fellohna sawitur an hrelo. MNF sorkarah tehfel ngai leh tihfel ngai awmte tihfel leh vek a ni a. Hripui avangin duh angin a felfai tluantling ta lo deuh a ni.

ZPM sorkara a changtu Minister in, leilung pian tirh atanga he Maumual hmun hi fel ngai reng renglo anga a sawi mai kha a mak hle a ni. MNF thi leh dar kha a ta emaw a ti mai niin a lang, a ti.

Pu K. Liantlinga, Ex. MLA, Asviser, MNF Gen. Hqrs. chuan inkhawm hi kaihruaiin, Pu Lalhmingliana, Secretary, MNF Gen. Hqrs. chuan hunserh a hmang.

(PETER CHHANGTE)

Secretary

Media & Publicity Department: Mizo National Front

Memo No. 482/2026/ Dt. 15.05.2026