March ni 23 2026 (Thawhtanni) hian MNF Senior Vice President Dr R. Lalthangliana chuan Saithah, Parvatui, Chhippui, Lallen leh West. Phailengte tlawhin khawtlang hruaitute nen inkawmhona an nei a, chhungkaw za a sawmkua (90%) chu kut hnathawka eizawng an nih avangin khawtlang hruaitute chu an khua theuhvin eizawnna atana an mamawh bik ziaka thlen turin a hrilh.

Dar 10:30am hian Dr R. Lalthangliana bialtu MLA chuan West Phaileng Zone Valley ball Season Ending Tournament chu Lallen-ah hawng a, chawhnu dar 1:00pm hian West Phaileng Presbyterian English School-ah Foundation for Drug-Free Mizoram huaihawtin, 'Drug Awareness Campaign' neihnaah khuallian a ni bawk. Sports chu zirna peng pawimawh tak pakhat niin, Mizo thalaite ruihhlovin a tihbuai mek lak ata chhanchhuahna hmanruaah pawh a hman theih a, tangkai taka hun in hman theih nan duhsakna ka hlan che u a ni a ti.

Dr. Thangtea chuan Excise & Narcotics department (END) chhinchhiah danin, kumin 2026-ah January aṭanga March 18 thlengin Mizoramah ruihhlo vangin mi 19 an thi. Thite chu kum 19 - 42 inkar an ni a, an zinga mi 5 chu heroin ti ṭhin niin, a bak zawng chu heroin leh ruihhlo dang khawih pawlh an ni. Ruihhlo vanga thite chu mipa 17 leh hmeichhia pahnih an ni a, record loh eng zat tak awm ang maw? Tan kan lak nasat a ngai hle mai a ti. Pathian min pekah kan nunna aia hlu a awm lo a, kum hlun lohna khawvel kan tih fo rualin, kan hriselna leh damreina turin ruihhlo lak ata inthiarfihlim turin Zoram thalaite ka chah tak meuh che u a ni, a ti bawk.

Heng a tlawhna khaw hrang hrangah hian Dr. Thangtea chuan nimin lawka Marpara leh Pukzing vengthara SLT company kawng siam chhe lai mipuiin a hnena an thlen chu bial fan remchan lai leh bialtu MLA anih anga endikin; PWD leh political party anga tumah a sawisel loh thu a sawi a, kut lawng pawha khawh phawk mai mai theih leh, a kam sirte pawh hawlh thlak mai mai theih a endik lai social media thenkhata lo darh ta vak kha company-ten an siamthat nghal avangin hlawk phah a tih thu a sawi. A endikna lai hmun chauh ni lo, a kawng tluana siamthat ngaite siamtha turin thawktute a chah nghal a, a kal hma hian a en tur thu company hotute a hrilhlawk thu a sawi bawk.

An Company Project Manager pawh hmu nghalin, "Sum tam tak senralna hna in thawk a, thawh zawhah in haw leh nghal mai a, in hnathawh hi a tha hle tur a ni" a ti a. Thirtiang tereuh te leka kawngpui thalai chhun chhia a nih lohzia pawh amah demtuten an hriat chianzia a rin thu sawi bawkin, hna tha chu kut lawng leh hawlh avanga chhe mai mai thei a ni lo, a ti. A hma pawhin heng lai hnathawh hi khawtlang hruaituten a chhiat em avangin an lo chhun khawh vek tawh thu a sawi bawk a, chhun khawktute zingah ZPM President Unit kal chhuak tate pawh an tel thu a sawi.

Dr. Thangtea chuan, "Kan rama hnam dang company hnathawkte hian an thawh zawhah ngaihsak zui lova, min hawsan leh mai thin avangin, an hnate hi Mizoram tan tha leh rotling ni tura an thawh theih nan mi tin hmalakpui turin ka sawm che u a ni. A tirah tha tak angin lang mahse, an haw hnuah chhe leh mai thin tam tak a awm a, in koh letleh chu a harsa thin. Hnathawh zawha haw leh nghal thin Company-te hnathawh hi uluk taka kan vilpui ngun a ngai," a ti. He kawng hi ZPM sorkar thar siam ni lo, Dampa bialtu MLA hmasa Pu Rintluanga'n MNF sorkar lai atang tawha theihtawp chhuaha a lo nawr ngar ngar tawh, a hlawhtlinna awm chho mek anih avangin Dr. Thangtea pawhin a vei hle thu a sawi.

(R.LALHMANGAIHA)

Secretary

Media & Publicity Deptt: Mizo National Front

Memo No.450/2026/ Dt.23.03.2026