May ni 14, 2026 (Ningani) zan khan MNF Senior Vice President Dr.R.Lalthangliana MLA chu Kolasib MNF Block hruaitute nen Circuit House Kolasib-ah inkawmhona an nei.

Dr.R.Lalthangliana, Chairman Programme and Policy, MNF chuan he inkawmhonaah hian MNF chuan policy and programme an duan chu mi thiam ruallte nen vawi tam tak uluk taka ngaihtuah hova an thutkhawm tawh thu a sawi a, fimkhur taka an kalpui avangin an la tlangzarh rih loh thu leh hun remchang hmasaah an la tlangzarh tur thu a sawi a. Pathian leh mipui zarah MNF sorkar leh hunah an hmachhawp leh tih turte chu uluk takin a tlangpui an duan fel tawh thu a sawi.

Dr.R.Lalthangliana chuan MNF a sorkar chuan tun anga sorkarin sum tam tak a khawhralna engemaw zat, mimal leh party mi leh sate venthawn leh induhsakna avanga consultant ruat vak vak ang chi leh political appointment inpek teuh teuh angte tihbo a nih tur thu sawiin, Adviser to CM heti zat kan neih mekte hi thil tul lo, sorkar sum tam tak sen ralna anih thu leh MNF sorkar a pian huna an tih ve chiam chiam loh tur thu a sawi. MNF sorkar liam taah khan CM Adviser pahnih chauh an neih thu a sawi bawk.

MNF programme and policy Chairman Dr R.Lalthangliana chuan, "Inthlan campaign laia tih tur intiam vak vak a, thlan tlin hnuah tih leh si loh ang chite chu MNF chuan kan ti ve dawn lo, keini chuan a tak taka kan tih tur, kan ramin a mamawh bik chauh, a mi nawlpuiin kan tangkaipui tur chauh kan pholang mek a ni, " a ti bawk.

(R.LALHMANGAIHA)

Secretary

Media & Publicity Deptt : Mizo National Front

Memo No.483/2026/ Dt.15.05.2026.