Vawiin June 5, 2026 (Zirtawpni) hian Tawi East Block MNF huaihawtin Dorawta Hall, Saitualah Mizoram Independence Puan Kum 60-na Lungphun hawnna leh Political Training neih a ni a, he huna khuallian Pu Lalchhandama Ralte, MNF Vice President & Leader of Opposition chuan jubilee lungphun a hawng.

Pu Lalchhandama Ralte chuan thu sawiin, "Zalenna sual champha lungphun hi thangtharten an la rawn hlut dawn chauh a. Kan hnam a upa tulh tulh anga hnam fing leh upa zawkte angin kan hnam martarte ngaihhlutna a sang zel ang. Tuna kan lungphun pawh hi researcher-te leh thangtharte tan a la hlu hle dawn a ni," a ti.

Zalenna sual chhan sawiin, "India hnuaia kan luh khan nasa takin tihhrehawm kan ni a. Kan hruaitu hmasaten awpbehna laka tal chhuak tur leh mahni kea ding tura beiin bul an tan a. Kan hnam pasalthaten nun thapa zalenna an lo sual kha a ropui hle a ni. Mi thenkhatin hnam movement kha sawi nep an tum thin, inzirtirna thalo tak a ni. Rambuai hun lai ti tein an sawi thin. Mahse, khang hunte kha rambuai lai ni lovin zalenna sual hunlai a ni," a ti a.

"June 30, 1986-ah peace accord ziah a ni a. Pu Laldenga khan kan chawl lai lawk mai a ni, a ti a. Muang lei atangin peaceful takin zalenna hi kan la nei ang tih hi kan beisei tlat a ni."

Pu Chhantea chuan, MNF hi party dang ang kan ni lo. Pathian leh kan ram tan tih leh Sam 20:7 kan innghahna bakah kan party preamble kan hriat nawn a ngai. Kan din chhan tak tak hriat a ngai, a ti a.

"Lalna leh thuneihna duh avanga 'MNF ni lo, Congress ni lo' tih vanga lo dingte hi chu reilotea kehdarh hmabak an ni. Keini chu Mizoram leh a chhunga chengte tan la ding kan ni a, hnam movement kengtu kan ni,"

"Kan party hi a thang zel a, hmalam kan pan mek a ni. AMC inthlan result avangin thlaphang suh u. ZPM sorkar hnuah inthlan lian tham tum li a awm tawh a. Kum 2024-ah Sinlung Hills Council-ah MNF kan chak. Kum 2025-ah Dampa by election-ah kan chak a. LADC inthlanah MNF kan chak bawk. AMC-ah erawh term hnih (kum 10) sorkar tawh kan ni a, anti-incumbency a lo awm a, kan chak ta lo a ni. Inthlan awm tawhteah hian chak ta vek ila kan chapo ang. Inenfiahna tur leh insiamthatna atan kan chak loh hi lo tul zawk a ni a ti.

"Kan hrawn mek sorkar hi a chhungah hnawk a tam hle a, an buai mek a ni. Rajya Sabha MP inthlan chu ruling party chan a ni thin. Amaherawchu, an candidate nomination siam danah tun dinhmunah hian (kan chak dawn kan ti lo) ZPM aiin MNF kan phur zawk a ni.

"Healthcare an kalpui dan enin private hospital thaten an zawm ngam lo, an zawm rual ruala tla chhe thei an ni. Thla nga chauh an thawhpui Synod Hospital bill, damlo 2942 enkawlna an batsak mek chu Rs. 7,73,47,001 (Nov 2025 -April 2026) a tling tawh a ni," tih sawiin MNF Vice President chuan MNF din chhan, kum 65 kal tawhah hian rinawm taka awm a, hnam martarte thisen hlutna chawi nung zel tur leh taima taka thawk turin kalkhawmte a chah a ni.

He hun hi Pu H. Lalremtluanga, President, Tawi East Block MNF-in a kaihruai a. MNF GHQ GS pahnih - Pu VL Krosshnehzova leh Pu David R. Lalsawmtluanga-ten thusawina hun an hmang bawk a. MNF Vice President hi GHQ hruaitu engemaw zatin an tawiawm a ni.

(R.LALHMANGAIHA)

Secretary

Media & Publicity Deptt/ Mizo National Front

Memo No.492/2026/ Dt.05.06.2026