MUP member te dawt laka inveng him turin Hachhek MLA-in a chah

14.02.2026: Vawiin khan Taitesena Area MUP Conference Vawi 12-na chu West Bunghmun Community Hall-ah neih a ni a. Hachhek bialtu MLA Pu Robert Romawia Royte chu khuallian niin, Kawrthah Civil SDO leh Kawrtethawveng BDO ni bawk Pu Obed Lalmalsawma Khualzahawm a ni bawk.

Hachhek bialtu MLA Pu Robert Romawia Royte chuan thu sawiin "Tunlaiin Mizo society-ah dawt sawi a hluar nasa a. Ram hruaitute zingah pawh sawrkar platform hrang hrang leh Assembly house chhung thlengin dawt leh thu belhchian dawl lo a tam hle a. Tunlaia social media platform hrang hrang YouTube, facebook leh Whatsapp-te hmangin mipuiah a darh zung zung a. Heng dawt tenawm tak tak hian kum upate leh naupang zawkte thlengin a tuam vel mek a. MUP member zawng zawngte social media-a an thil hmuh leh hriatte awih tur leh awih loh tur chin thliar thiam turin Hachhek MLA hian a chah a. An tu leh fate pawh fimkhur tura zirtir turin a fuih bawk a ni.

Hachhek bialtu MLA Pu Robert Romawia Royte chuan MUP chu hnam dangte neih ve loh, Mizo zawng zawngte tâna rohlu a ni tih sawiin MUP conference rorelte ngai pawimawha tha taka bawhzui turin a fuih a. Tawn hriat ngah tawh an nih anga khawtlâng rorelna leh inrelbawlnaah inkiltawih lova finchhuah tur zawka tang thin turin MUP member kalkhawmte a fuih a. Taitesena Area MUP-te chu hmun pawimawh luahtu an nih anga MUP area dangte entawn tlâka che thin tura chahin an duh leh mamawh a hnena thlen zel turin a chah a, Hachhek bial hmasawnna atana thawhhopui turin a sawm bawk a ni.

He inkhawmpuia Khual Zahawm Pu Obed Lalmalsawma pawhin thu sawiin, MUP member-te chu bial hmasawn nâna theih tawp chhuah turin a sawm a, namawh an neih chuan a hnena inthlahrung loa thlen turin a sawm a ni. He inkhawm hi Pu J Lalchungnunga, President, MUP Taitesena Area-in a kaihruai a. Chairman hian Taitesena MUP area aiawhin bialtu MLA duhsakna leh tanpuina hrang hrang an dawn thin avangin upate aihawhin lawmthu a sawi bawk a. Zaithiamte zaiin chawhnu lamah rorel leh lengkhawm zai intihsiaknate neih a ni a. Taitesena Area hian khaw 14 a huam a, palaite an kal tha hle a ni.

Sd/- H LALAWMPUIA

Secretary

Media& Publicity department

Memo No.MNYF - PR - 75

Dt.14.02.2026