Vawiin hian Mizo Hnam Runah chhung inkhawm neih a ni a, Pu K Lalrinliana Ex Minister, Adviser chuan thu a sawi a. "MNF chu Pathian remruatnaa Mizote tana din a ni. Chu chu hun lokal zel hian a tichiang tulh tulh a ni," a ti.

Pu Rintea chuan, "MNF chuan a din tirh aṭanga vawiin thlengin harsatna hrang hrang a lo tawk tawh ṭhin a. Hniam deuh laite pawh a lo nei tawh ṭhin a, mahse, a dingchhuak leh ṭhin. Mizote kan ral loh a, khawvel hriata kan parchhuah theihna tura Pu Laldenga te lo din MNF hian hma lam a pan zel dawn a ni," a ti a. "Tunah pawh hian hniam deuhin lang mah ila Pathian leh kan ram tan titute hi kan tho leh dawn a ni, " a ti bawk.

MNF Adviser chuan MNF-in zalenna an sual tak tak lo tia thangtharte thinlunga dawt tuh tum an awm ṭhin chu pawi a tih thu leh, zahthlak a tih thu a sawi a. "MNF khan zalenna an sual tak zet a ni tih hi thup rual lovin thangtharte'n thudik an la hre chho zel ang," a ti.

Pu Rintea chuan, "Tun ZPM sorkar chhunga inthlan hrang hrang - Sinlung Hills Council, Dampa by election leh Lai Distric inthlanah te kan che ṭha hle a. Aizawl Municipal inthlanah erawh chuan kan che ṭha lo hle thung a ni. AMC inthlana kan che chhia hi Pathianin kan chapo phal lova min benghniamna a nih ka ring a. Eng pawh nise, Pathian leh kan ram tan titute hian Pathian thil tum thlir chunga hmalam kan pan zel a ngaina ni," a ti.

Chhung inkhawm hi Pu Lalmuanthanga Fanaiin a kaihruai a, Pu H Vanlalruata Jt Secretary-in hunserh a hmang thung.

(LALLENMAWIA JONGTE)

Secretary

Media & Publicity Department/ Mizo National Front

Memo No. 491/2026/ Dt.05.06.2026