"Mipui thlamuanna tura MNF bul tan Health Care Scheme | ZPM Sorkarin MUHCS hmangin mipui min um chi-ai mek" - Dr. R. Lalthangliana

Vawiin May ni 27, 2026 (Nilaini) hian West Lungdar PWD IB-ah Dampa East MNF Block hruaitute infuihtharna neih a ni a. He hun hi MNF Senior Vice President Dr. R. Lalthangliana bialtu MLA chuan a hmanpui a, party-in hma a lak dan tur hrang hrangte infuihtharna an nei.

Dr. R. Lalthangliana Health Minister hlui chuan Health Care Scheme neih ngei hi a tha kan ti a, chuvangin MNF sorkar-in bul kan tan nghe nghe kha a ni a, mipuite thlamuanna tura duan a ni. Mahse tunah chuan sorkar hian MUHCS hmangin min um chiai mek zawk a ni, a ti.

Dr. R. Lalthangliana chuan inziahluhna man a sang a, mirethei zawkte tan phurrit nasa tak a tling a. Mizoram sorkar hnathawk MR Scheme tibovin an hlawh atanga cut luih sakin a zawm luihtir vek a. Pensioner phei chuan rei tak sorkar an nawr a, tunah hian tihluihnain an zawm ringawt a. Pensioner-te hian an nupui pasalte bak an kep thei ta lo a ni, a ti a.

Zokhawsanga insawn ta Assam Rifles te hi MNF hmalakna avanga chhuak an ni tih mipuiin an hriat vek thu sawiin, Dr. Thangtea chuan MNF sorkar-ah AR ten MoU-ah phut an neihte chu Mizoram sorkar tan phurrit a nih avangin pumpelh tuma innawr tawn reng a ni a, an chhuah lawk loh phah chhan pakhat a ni a ti a. "ZPM-in thuhnu dawn lovin MoU tha vak lo an rawn pawmpui a. A thlawna nitin tui litre nuai 4.5 (4,50,000 litres | PHE rate angin thla tin a tlem berah ₹ 21,60,000 man hu) pek te, Zokhawsang ram a pulunga nei hlen thei tur ang hiala term tawp ruala automatic-a kum 99-dang nung zui tura tih te a tel a. MNF sorkar kal ta kha kan kuhmum that teh reng nen, ZPM-in a nih tur angin a par chhuahpui mumal thei ta lo a a, a pawi hle a ni, a ti.

‘ZPM MLA 27 ten kan duh angin ro kan rel ve ang, in sawi ve tur a awm lo’ ti zawnga CM ber-in a sawi takah chuan AR ram chhuahsan ngaihtuahna-ah pawh MNF chu kan telzui ta lem lo, a ti bawk.

MNF Senior Vice President hian Ailawng atangin voter 34, South Sabual atangin BJP voter 5 leh Bawlte atangin voter 4 a lawmlut bawk.

He hun hi Pu Zirliana Dampa East MNF Block President chuan a kaihruai a, General Headquarters atang te, Block leh Unit atangtein thusawi ngaihthlak a ni bawk.

(R. LALHMANGAIHA)

Secretary

Media & Publicity Deptt: Mizo National Front

Memo No.486.MNF/Media/ Dt.27.05.2026