Press Release

Vawiin hian Mizo Hnam Runah chhung inkhawm neih a ni a. Pu R Tlanghmingthanga Ex Minister, National Core Committee member ni bawk chuan thu a sawi. "India leh MNF inremna avanga inhung bikna Article 371 (G) kan neihte hi a hlu tak zet a. India Parliament meuh pawhin pass mahse, Mizoram Legislative Assembly rem tihna lo chuan hman ve ngawt a theih lova. Forest (Conservation) Bill 2022 MNF sorkar-in kan ram tana him lova a hriat avanga a lo hnawl tawh ZPM sorkar-in NGO leh Party-te rawn lova an pass (adopt) ta ngawtte hi a pawi hle a ni," a ti.

PWD Minister hlui chuan, "MNF hunlai, PWD minister ka nih tirh khan Aizawl kawngte hi a la chhe hle a, nasa takin kan siam ṭha a. Tunhnu hian khangte kha theihnghilh a lo ni zo ta a. Thil ṭha tam tak sorkar hmasate khan he hnam leh he ram tan hian kan lo ti tawh a, hmasawnna ruhrel tam tak a lo din tawh a ni," a ti bawk.

Pu R Tlanga chuan, hnama pianthar a ngaih thu a sawi a, "Pathianin duh taka a siam he Mizo hnam chhanhim tur hian hnama kan pianthar a ngai a. He hnam venghim tur hian Pathianin mi dang daih, hnam dang daih a ruat lova, keimahni Mizote ngei kutah a awm a ni. Hnama min siamtu Pathianin min siam chhan leh ni tura min duh kan nih theih nan hnamah kan pianthar a ngai a. Pathian leh kan ram tan titu MNF-te kan ni tih i hrereng ang u," a ti.

Pu R Tlanga chuan, "MNF party chu mahni hamhaina leh pumpui tih puarna tur ringawt atana belh chi a ni ve lo. Mahni inphat a ram leh hnam tana inhlantute awmna tur a ni. Kan kal tawh dan enin insiam ṭhatna tur tam tak kan nei a, insiamṭha chung zelin Pathian leh kan ram tan hmalam kan pan zel tur a ni," a ti bawk.

Chhung inkhawm hi Pu VL Chhuanga Chhangte, Secretary-in a kaihruai a, Pu F Vanlalbela'n Jt Secretary-in hunserh hmangin, Pu Joseph Lalnunzira, Secretary-in Election chungchang report a pe bawk.

(LALLENMAWIA JONGTE)

Secretary

Media & Publicity Department: Mizo National Front

Memo No. 483/2026/ Dt.18.05.2026