Dampa bialtu MLA Dr.R. Lalthangliana chuan vawiin March ni 21, 2026 (Inrinni) hian Marpara North, Hruiduk, Pukzing, Pukzing Vengthar, West Phulpui leh Phuldungseite tlawhin political party hruaitute leh khawtlang hruaitute inkawmhona an nei.

Dr. Thangtea chuan Hruiduk leh Pukzing vengtharin tui lama harsatna lian tak an tawh reng thin, litre khat cheng khata an lei reng sutkian anih theihna tura solar pump hmanga Mar lui lak theih nana cheng nuai 837 senna tura hma an lo lak tawh thin, hmalakna mumal awm thei silo chu tihhlawhtlin thuai anih theih nan PHE Minister Prof Lalnilawma leh Mamit lama PHE official-te chu telephone-in a biak sak a, a rang lama lo ngaih pawimawhsak thuai turin a ngen a ni.

Former Health Minister Dr.R. Lalthangliana chuan Marpara leh Phuldungsei PHC pawh tlawh nghalin thawktuten nasa taka an indaihloh thu an lo hrilh a. Dr.Thangtea chuan a chhan hrilhin, MNF sorkar lai khan hetianga thawk tur bik rawihna tur hi kum 5 chhung atan world bank pawisa atangin cheng nuai 28000/- an pawh chhuah thu a sawi a. Kum 5 a tlin hmain a project a tawp dawn tih an hre lawk vek a, lo inruahman lawka sum ngaihtuah dan tur ZPM sorkar hian exit plan scheme ruahmanna an lo neih lawk loh vanga harsatna tawk an nih thu a sawi a, "Thawktu tam tak rawih chhunzawmna pawisa awm lo hi sorkarin ruahman lawkna a neih loh vang a ni," a ti. ZPM sorkar hian health service hi chu kan thih leh dam inkara thawktute an nih avangin ngaihthah lovin, hma la thuai turin ka phut a ni a ti bawk.

Dr.Thangtea chuan Hruiduk leh Silsuri-ah In engemaw zat thli leh ruahin a tihchhiatsak chhungkaw tan tanpuina tur thuneitute hnenah ziaka a thlen tawh thu sawiin a ranglama ngaih pawimawhsak turin a ngen a ni.

Marpara hi khaw hlun leh pawimawh tak ramri hrula awm a nih avangin mikhual thlenna tur Tourist Lodge an mamawh hle thu a sawi. Marpara leh West Phaileng inkar kawng MNF hun lai atanga NABARD sum hmanga black topping leh metalling tih mek pawh duhthusam lo laite bialtu MLA hian a hmunah a enfiah a, a then laiah sealed coat a ni lo a, bitumen a tlem hle a, kut lawng pawhin a khawh theih thu a sawi a, company hotute be pawp nghalin tha taka siam turin a hrilh nghal. "Harsa takin pawisa kan nawr chhuak a, hnathawh zawh ruala haw leh mai tur kan rama hnathawk vai ho hian thalo taka hna thawkin min haw san leh mai ang tih a hlauhawm a ni," a ti. Pukzing leh Phulpui inkar pawh rang tak leh tha taka thawk zo thuai turin a thawktu SLT construction company-te a nawr thu a sawi bawk.

Nizan khan Pukzing daiah Marpara buhfai phur Truck lian accident a, Pukzing YMA ten an senghawisak thingpui inna tur leh Driver hliam tuar inenkawlna tur tangkai fai Dr.Thangtea hian a hlan nghal bawk.

(R.LALHMANGAIHA)

Secretary

Media & Publicity Deptt: Mizo National Front

Memo No.448/2026/Dt.21.03.2026